Dünyaca məşhur Transfermarkt saytı ən baha heyətə malik futbol klublarının yeni reytinq cədvəlini açıqlayıb. Pandemiya ilə əlaqədar bəzi futbolçuların transfer qiymətinin düşməsi siyahıda yerdəyişmələrə səbəb olub. Dünyada heyətinin ümumi dəyəri 1 milyard avronu keçən yalnız 1 komandanın olması diqqət çəkib.
Transfermarkt saytının araşdırmasından sonra siyahıda 1-ci pillə “Mançester Siti”yə verilib. Şəhərlilərin heyətinin ümumi dəyəri 1 milyard avrodan çoxdur. Dünya futbolunda ən baha heyət İngiltərənin bu klubuina məxsusdur. Digər komandaların dəyəri milyon avrolarla ölçülür. 2-ci pillədə “Liverpul” qərarlaşıb. Mersisaydlıların futbolçularının transfer qiyməti ümumən 967 milyon avrodur. Ilk 3-lüyü 888,5 milyon avro ilə “Real” tamamlayır. “Kral Klubu”nun əzəli rəqibi “Barselona” cuzi fərqlə geri qalır. Ərəb şeyxlərinin sərmayə yatırdığı PSJ 5-ci sıradadır. “Bavariya”, “Atletiko”, “Tottenhem”, “Çelsi” və “Mançester Yunayted” də ilk onluğa daxildir. Maraqlıdır ki, burada İtaliyanın bir klubu belə yoxdur. Heyətində Kriştianu Ronaldu və Paolo Dibala kimi futbolçuların çıxış etdiyi “Yuventus” yalnız 11-ci yerdədir. “İnter”, “Napoli”, habelə İngiltərənin “Arsenal” klubu da 2-ci 10-luqdadır.